والي الجزيرة (عاوزا) تسليم مفتاح ياعمك ؟

بقلم/صبري محمد علي

خاص ب الإنتباهة
لم تمض ساعات على ما كتبناه صبيحة هذا اليوم لسعادة اللواء شرطة فضل عبده مدير عام شرطة ولاية الجزيرة عما حدث لقرية (القويزة) شمال غرب الولاية و وضعنا بين يديه المعلومات الصادمة التي تناولتها (الميديا) بالأمس …

إلا و يفاجئنا اليوم خلال الوسائط الخطاب المبذول بالنمرة و تاريخ الامس
الصادر من السيد نائب المدير الزراعي للجزيرة السيد /اسماعيل عبد المحسن موجهه للسيد محافظ المشروع السيد عمر مرزوق يشرح فيه الاعتداء الذي تم من قبل قوات الدعم السريع علي (باشمفتش) مكتب القويزة واسرته بالتفصيل .
كامل تعاطفنا مع أسرة (الباشمفتش)

لكن الاخطر من ذلك …
هو ما ورد في خاتمة الخطاب وهو ….
أن القسم الشمالي الغربي ويشمل مكاتب الفراجين ، السديرة ، القويزة والقسم الشمالي ….
ويشمل مكاتب كاب الجداد ، الصحوة ، اللعوتة ، ود الترابي جميعها اصبحت خارج سيطرة المشروع وغير آمنة !
(هكذا يقول الخطاب)

يصل الخطاب للسيد المحافظ
(قوووم انتا)
يالمحافظ بالقلم الاخضر
(اظنه كان زعلان شديد)
اكتب ….
ثلاثة كلمات فقط
( السيد الوالي . لعنايتكم)
التوقيع
بتاريخ (١٠) اكتوبر .

اولاً تفادياً لاي (لفح شبشب)
قلت (يا ولد) خليك تقيل شوية وانتظر ..
(حقيقتن) …..
لغاية قبل المغرب (الشمار) ده بقى يفور لي في حلقي
بالمناسبة ….
الشمار ده يا جماعة ما عندو مدة صلاحية برضو

فتواصلت ….
مع شخصية مرموقة في إدارة مشروع الجزيرة فأكدت لي صحة الخطاب وان الشرح المذكور هو للسيد المحافظ .
بل و زادتني من الشعر بيتين …
اولهما ….
ان هذه (المليشيا) مُحتلة مكتب (الفراجين) غربي (الجديد الثورة) منذ اكثر من شهر تقريباً

ثاني البيتين هو ….
انها تتحرك من اقصى الشمال وحتى كاب الجداد بصورة شبه يومية يعني يطلقوا كرعيهم ويرجعوا في
(امان الله وحفظه)

اظن لغاية هنا حقو باقي الاسئلة
ليه؟ وكيفن
وبتحاوموا لشنو؟
واين الحكومة ؟
الكلام ده …..
نخليهو للجنة أمن الولاية ! للاجابة عليه
(لووو) ….
إستفاقت من سباتها

طيب نجي …..
لصاحبنا السيد
الوالي القال حدود الولاية مؤمنة ولو دخلت (نملة) شايفنها

وهو القائل …
ذات يوم (لا فض فوه) ان شمال الجزيرة اصبحت منطقة عمليات وتدار من القيادة العامة !
وهو …
النافي عن نفسه نفياً قطعياً صفة (الدعمته) في احد لقآته !

نقول ل (اخونا) اسماعيل عوض الله العاقب
عاوز الجزيرة تقدمها للغزاة والمرتزقة (تسليم مفتاح) يعني ؟
ومنتظر شنو ؟
اذا شمال ولايتكم مستباحاً منذ شهر و زيادة !

السيد الوالي …..
ارجوكم ..
وانتم رئيساً للجنة امن الولاية وبالطبع رئيساً لكل ما يتفرع عنها من لجان محليات
ياخي (اتلحلح) شوية !
ولو غلبتك ياخي
لا يُكلف الله نفساً الا وسعها
استقيل ياخي !
ونحن …
(حا) نقعد لمتين كده
إنت تبيع ونحن نشتري في الكلام !

والله يا سعادتك ….
تعمل شنو
تلبس ياتو شبشب
تلف عمة و اللا تلبس سفاري
تتصل بي منو و اللا ما تتصل
تنسق مع منو
دي ما شغاتنا
انتا رئيسنا وقد تعلمنا في مدارسنا ان لا نفهم اكثر من الحكومة !
إتصرف وكان الله في عونكم
فكل الصلاحيات بين يديكم

حتى لا نضطر غداً (لا سمح الله)
ان نغني لكم
من بعد ما فات الاوان
الليلة جاي تعتذر !

اللهم من اراد بالجزيرة خيراً
فأجر الخير علي يديه

ومن اراد بالجزيرة سوءاً
فأجعل الدائرة عليه